黎分享一下我 坐 月 時候食嘅嘢先！
喺我仲係 孕婦 既時候做過啲功課，亦都有去聽過啲坐月講坐
因為我冇請陪月
喺坐月餐個部份～刨文諗定一個月嘅餐單又冇乜特別搵到啲咩！
唯有睇吓呢度睇吓嗰度，就咁決定我坐月嗰陣時每日每餐食既野～～～～
簡介一下我自己先，我係順產媽，全人奶餵bb（頭一個月都有補奶粉）
我坐月同大家傳統觀念
坐月要狂補⋯⋯有啲唔同
聽講座，生完BB之後第一個星期係要盡量幫身體恢復～先食簡單家常菜
第二＆第三個星期先開始慢慢加入一啲中藥材／加薑，咁就可以開始慢慢比較傳統既坐月餐
到第四個星期（或者惡露完咗）就可以全力進補，要幫助身體復原！
不過講真啦，如果屋企唔係有啲好叻煮嘢食嘅屋企人、又或者有請陪月，菜單都好難會好pro！
我都只係喺家常嘅菜式上邊，加薑／果皮或者啲簡單補少少嘅中藥材咋！
當我喺醫院返屋企之後果兩個星期，因為仲有惡露，所以只係食返啲普通家常便飯，啲湯啊餸啊加啲果皮咁，同飲下啲上奶湯咁！
餐餐都食得好飽，因為我只係一個中產媽媽，BB又好似唔係好夠食，所以只好自己努力食
「食多啲會做多啲奶呀嘛！」
要特別鳴謝我個伙頭軍老爺，一日三餐咁煮
食完仲要打掃戰場～其實都幾辛苦 (＞人＜;)
首先，每日朝早都會有一煲粥
下晝食飯大多數都又會有湯
我係早餐同午餐之間 會自己飲一盒屋仔奶／黑豆漿（每日交替咁飲）
其實咁樣已經可以吸取左好多水份，對餵母乳來講
如果可以乖乖咁飲晒！奶量應該唔會少得去邊！
橫掂成日都係屋企，猛飲湯猛飲水都唔怕因為可以成日去廁所，不過都係等個會陰傷口好啲先至咁做啦～
我有一開始唔識得飲咁多水
到後來發現飲水真係會多D奶，就努力咁狂飲！
因為母乳媽咪group既過來人媽咪們都話要日日飲4L水！（大家不況FACEBOOK 入母乳媽媽交流站）
早餐
我平時係食西式早餐多過中式早餐嘅人
但我坐月嘅時候翌日都一定會食四碗粥做早餐～
到差唔多第四個星期先開始成返蛋三文治嗰啲～
每日既早餐大約係
中式既排骨粥／南瓜肉片粥 ／魚粥 或者 瘦肉粥
然後食完過多陣就會飲以下嘅飲品
牛奶、芝麻豆漿、鈣思寶（上奶佳品）
生完之後成個人個飲食習慣，時間規律都同平時超唔同
變得三餐唔定時！（因為要就住埋身餵奶嘅時間）
午餐
午餐日日都係一份肉，一兜湯，一份菜（全部清淡為主）
坐月之前都有調查過有冇啲咩飲食禁忌
坐月到宜家都會好避免食～因為我係人奶媽媽，退奶嘅嘢我都會避免
生果方面都係食啲正氣啲嘅，橙就一定冇食過⋯⋯
大多數都係食蘋果、提子、車厘子⋯
飯最好每餐兩碗
做奶好重要架！
湯就通常都飲三碗，湯湯水水對做奶好緊要！
所以我通常都會先飲一碗湯～飯後再補多兩碗！
雞湯、排骨湯、豬腳湯、魚湯
大多數都係呢幾味！
而且重點係，煲完湯可以食埋啲湯渣做餸！又或者一雞兩味，做湯做餸咁
好方便架⋯⋯
有啲人平時食得好多調味嘅，就可以坐月嘅時候，改一改自己飲食嘅壞習慣
等我分享一下，最簡單知道會唔會推介嘅食物嘅方法，就係涼嘅嘢唔好食！補血嘅嘢就食多啲！
因為其實奶係血做嘅！成日睇埋晒嗰啲上奶退奶表都好煩
茶點
人奶媽媽成日都會覺得好餓既，所以有時都三點三時已經好肚餓～要搵嘢食！
我有時就會食包餅、飲杯奶或者豆漿
好啲嘅有時就會叫老公去買個糖水紅豆沙、芝麻糊、薑汁湯圓⋯⋯
自己坐月冇請陪月
已經勁辛苦
當然要食返啲甜嘢補補數！
芝麻糊～
晚餐
晚餐同午餐一樣一份肉，一兜湯，一份菜，加多份水果
湯嗰方面～大多數都係飲返下晝煲嘅湯！
下晝煲多啲夜晚就可以飲
好方便！
再重申一次！人奶媽媽要好好努力咁飲湯湯水水呀
我坐月嗰陣時好辛苦架～
每日要狂食嘢、狂餵奶、狂追奶、狂湊b⋯但係諗返轉頭都覺得好幸福！
嗰時老公請咗兩個星期陪產假
飲食就定時啲，之後到而家都三餐唔定時！
我知好多人坐嘅時候都會飲炒米茶，但唔知點解係咪熱氣咗啲，我一飲阿B就冇乜屎冇乜尿，所以我最後都放棄晒左產前準備嘅炒米茶包！
我就只係狂飲水咋！
生完之後仲有keep住食Materna！
其實 Materna 已經有充足嘅營養， 唔需要額外再補充多啲其他維他命嗰啲
好多人都話人奶媽媽好容易瘦！
但其實餵人奶又要食多啲野～其實我到宜家都收唔番身！
0 意見:
張貼留言